#1
[Image: 1439801939PengantinBanjar4Macam.jpg]

Busana adat pengantin Banjar ada tiga macam, yaitu bagajah gamuling baular lulut, baamar galung pancaran matahari wan babajukun galung pacinan. Tapi sebagian urang manyambat ada ampat macam, nang ditambahi busana baamar galung pancaran matahari nang pakaian biniannya mamakai tilai panjang.


    1. Bagajah Gamuling Baular Lulut
      Busana Pengantin Banjar Bagajah Gamuling Baular Lulut.Ngini ngaran busana pengantin Banjar pamulaan nang dipengaruhi budaya Hindu nang kelihatan eksotik. Pakai roncean kambang melati wan mawar nang disambat bogam jua rangkaian melati nang disambat karang jagung.Pasangan pengantin bamahkota bagajah gamuling baular lutut nang diulah matan lingkaran logam bulat. Dibentuk jadi awak dua ikung ular lidi disambung jadi satu nang bagian mukanya diandak amar atau mahkota batatah dua buntut ular naga barabut kumala nang baandak ditangah dua kepala naga. Di bagian patamuan buntutnya diandak garuda mungkur paksi melayang.Di sebelah kiri, kanan wan muka ular lidi diandak kambang goyang nang jumlahnya ganjil. Pengantin binian wan lakian di beberapa bagian busana nang dipakai bahias payet ditambah macam-macam aksesori nang maulah bagus penampilannya. Nangkaya di tapih nang dipakai ada motif binatang halilipan nang dihias sulaman benang emas, manik wan payet nang cirinya merayap ke bawah.Busana pengantin Banjar klasik nang berkembah wayah zaman kerajaan Hindu di Kalimantan Selatan ngini bisi arti pelambang. Nangkaya naga di mahkota nang melambangakan ketinggian derajat nang memakai, ular lidi lambang kecerdikan, babisa tapi kada batampay kaharatan, sadangkan paksi melayang malambangakan katangkasan.Penampilan pasangan pengantin nang harum wan kambang-kambang segar nangkaya mawar wan melati bisi arti khusus jua. Bogam bauntai mawar lambang kawanian, melati lambang kesucian wan melati kuncup malambangakan pengantin masih bujang. Anyaman janur babantuk halilipan nang diandak di belakang malambangakan sifat rendah hati, jujur, kada mau takabur wan kada mau mangganggu urang lain kacuali mun diganggu badahulu.
    2. Baamar Galung Pancaran Matahari
      Busana Pengantin Banjar Baamar Galung Pancaran Matahari.Nangkaya ngaran busana nang artinya basinar kaya matahari, pasangan pengantin kalihatan gemerlap wan balutan busana nang dipengaruhi budaya Hindu wan berkembang wayah mulai mulai masuk pengaruh Islam di Kalimantan Selatan.Kada ketinggalan aksesori kalung cikak, kalung kebun raja, anting bauntai panjang, kilat bahu, galang, cincin, galang batis wan selop basulam benang emas. Ditambahi roncean bogam penghias kepala jadi perpaduan nang bagus nang kawa menampilakan kebungasan pengantin Banjar.Kada pengantin binian ja, pengantin lakian jua memakai busana mewah lengkap wan laung, jas buka kada bakancing, salawar panjang wan sabuk atau tapih handap.
    3. Babaju Kun Galung Pacinan
      Busana Pengantin Banjar Babaju Kun Galung Pacinan.Perpaduan nuansa Timur Tengah wan negeri Tirai Bambu membawa pambauran nang unik. Ngitu nang kelihatan dari busana adat pengantin Banjar nang malihatakan masuknya pengaruh pedagang Arab, Gujarat wan China di Kalimantan Selatan. Warna-warninya nang khas wan menawan manjadiakan busana adat Banjar ngini balain wan Bagajah gamuling wan baamar galung.Busana pengantin pembauran ngini kelihatan jelas dari bentuk baju pengantin lakian wan binian. Pengantin lakian memakai kupiah alpe, baju gamis, wan jubah nang dipengaruhi pedagang Gujarat nang membawa Islam ke Indonesia. Tilai tangan panjang gaya cheong sam nang dipakai pengantin binian lengkap wan rok pias basulam wan batabur manik wan mote dipengaruhi budaya negeri Tirai Bambu nang dibawa bubuhan pedagang dataran Tiongkok nang datang wayahitu.Kemilau aksesori nang mahiasi kedua pengantin nang mambungasi penampilan kada luput dari nuansa kedua negeri ngitu. Nangkaya tusuk konde bentuk Laam (Arab), tusuk burung Hong, sanggul bulat dari kiri ke kanan nang disambat galuh pacinan gasan binian. Gasan lakian kupiah alpe tinggi 15 cm ditambahi lilitan surbam.
    4. Baamar Galung Modifikasi
      Busana Pengantin Banjar Baamar Galung Modifikasi.Busana pengantin Baamar Galung Pancaran Matahari paling populer wan rancak dipakai. Busana adat ngini ditambahi sentuhan mode wayahini tapi tetap kada meninggalakan adat nang berlaku.Nangkaya busana adat asli nang pakai baju poko gasan pengantin binian, jua menyesuaiakan pemakai mun handak memakai sentuhan Islami, biasa diganti wan tilai panjang. Ada jua nang ditambahi sarudung tapi tetap dihiasi wan amar atau mahkota wan aksesoris nang lain.
Reply

Forum Jump: